2007年9月二人成行日本大阪之旅 (3)

2007年9月11日 (星期二) 晴

 

依度d早餐好好味，食過早餐後，我們便出發往今天的行程。

 

9:00am串本海中公園 ~ 這裡有著各式各樣的海洋生物，海底中有一條長達24米 的海底觀光隧道，見到好多好得意的魚，不過最開心既都係見到海龜，小海龜尤其可愛，可惜不能抱著合照，只好找來海龜毛公仔代替。由於這裏臨海的關係，非常大風，不過海風撲面的感覺還不錯。

11:30am 第二站去參觀三斷壁，這裡是古時海員登陸的地方，買了入場票(約hk$50)，便可乘搭電梯到地底。地底燈光暗黃，加上地面濕滑不平，需要打醒十二分精神，有點探險的感覺。今天風浪不算太大，所以我們可到著陸的洞口一看，海浪居然翻上幾尺高，十分澎湃，這樣的浪居然也不算大…真不敢想像「大浪」時是什麼模樣。

 

參觀過後，我們便到崖上拍一些照，今天天氣有點熱，所以到了小商店嘆下冷氣，一入門口…已有店員遞上一杯梅子茶，味道咸咸的，幾好味…還有點醒胃的感覺。在店內逛了一圈，買了點魷魚絲(約hk$50，味道很不錯…母親大人超喜歡)及和菓子後便離去了。

 

12:45pm 風和日麗的天氣，最好的遊覽地方非海邊莫屬，千疊敷這名子的由來代表一千張榻榻米總和的意思，今次由我充當攝影師為豬頭人拍照，可惜這個模特兒極不合作，話驚趺落海…死都唔肯行出d，令我無法拍出最完美的照片。

 

離開千疊敷時，先去買了杯明治牛奶雪糕(約hk$14)，無心插柳下試食了粒大元貝，成個五元甘大粒，居然原粒試食…實在太慷慨了，豬頭人話唔食唔食，點知食左人兩粒先走。

 

1:30pm 終於到左午餐的時間，午餐是我期待已久的魚市場，一到埗後…我便第一時間走入Tore Tore海鮮市場，豬頭人也取笑我的速度比平時快九倍。市場內份為三部份，分別係乾貨店舖、food court及海鮮市場，師傅早已將一條一條的大魚製成刺身，終於體會到咩叫新鮮即製。當刺身拼盤(約hk$450)上枱時，隻眼即時發亮，真係好大盤喎！！第一件食的…當然係Fatty Tuna啦，一入口…真係不得了，超香滑，個種魚香真係好味到無法形容，一口氣吃下三件…實在太美味。刺身還包括了海胆、帶子、三文魚、魚、鱆紅魚、吞拿魚，款款都鮮甜美味，實在太抵食喇！！

食飽飽之後，我們把握時間到商店逛逛，我們到菓子店買了紅豆叮噹餅(約hk$14)、水晶菓子(約hk$25)；再到梅工房購買豬頭人極為喜愛的梅子果凍(約hk$30/@)；禮盒手信；手造糖(約hk$18/@)等，便離開tore tore喇！！

 

在香港經常聽到有關日本備長炭的功效，今次在備長炭博物館有機會一暏其製作過程，真係大開眼界，原來除左係一舊炭外，仲可以製成備長炭洗頭水、牆紙、洗面膏、樂器、過瀘器等，而且仲可以有吸濕、除臭、防菌等的功效。可惜備長炭是不能攜帶上機的，豬頭人想買個備長炭枕頭把不行，只好食件備長炭曲奇(約HK$15/包)補數。

黎到紀州…當然不得不提紀州特產「紀州梅子」，日本人對梅子十分喜愛，餐桌上不時都備有梅子，紀州梅可說是首屈一指。在梅子工房內，我們可看到各式梅子的成份和製作過程，而且還有關於梅子的3D動畫供遊客觀賞，雖然是以日語配音聽唔明，不過3D的動畫都好好睇。工房內梅子的種類實在太多…都唔知揀咩好，所以我地最後只係買左一袋青梅(約hk$48)就走了。

 

上到車上，等一時間開了包青梅來吃…一個字~~酸~~，酸到諗返起都酸，我吃了一口就給了豬頭人，他吃到面容扭曲。

 

過酒店前，我們先到了便利店購物，Family Mark店子不算太大，不過貨物種類都算好多，仲有化妝品買添，不過我要把持住，留返去心齋橋先掃貨。最後我們重點掃零食，杯面、糖、薯片、魷魚…買左兩大袋，之後便帶著愉快的心情回酒店了。

 

經過一天的遊樂，到達酒店時天色已黑，今晚住的地方係紀州皇都高級露天溫泉酒店，同串本同屬皇都集團旗下，不過依間仲靚d。好想快d食完野去浸溫泉，所以一返到房間，快快換過浴衣後便到餐廳食晚飯。

 

今天的晚餐是食Shabu Shabu，Shabu Shabu同平時打邊爐唔同，只係用清水烚熟d食物，然後沾上味濃的醬料，我主攻牛肉及金菇，食飽之後仲有飯後甜品，就係『雪糕天婦羅』，炸過的旦白外層包著冰凍的雪糕，好得喎…豬頭人仲想瓜分我個份添~我當然力保不失啦。

 

食過豐富的晚餐後，由於太飽不宜浸溫泉，所以我們先在酒店內影下相，跟住去買d野食做宵食，响度豬頭人同中午所試食的大元貝(約hk$75)再次相遇，佢即時買下來。

 

閒逛了1小時候，我們便向溫泉進發，經過了前兩天的溫泉初體驗，晚晚浸溫泉已成了我們的指定動作。今天我選用了酒店提供的「馬油」系列，沖完之後由頭到腳都充滿了滋潤。今天的溫泉水好像較熱，浸不夠十分鐘已全身熱騰騰，上水泡一泡冷水後再浸了十分鐘，之後便沖身離開，因為約左豬頭人食宵夜，所以我d動作都變得特別快。

 

返房嘆宵夜前，我地先到去自動販賣機買野飲，買左一支海底深層水(約hk$18)及一罐檸檬啤酒(約hk$20)。返到房換件衫就開始開餐，是日宵夜包括：由北海道速遞至的海胆8隻(約hk$420)、和歌山風味杯面(約hk$28)、即食大元貝(約hk$72)，依餐宵夜實在係太豐富…人生實在是太美好了。

2007年9月二人成行日本大阪之旅 (2)

2007年9月10日 (星期一) 天陰、微雨

 

今朝清晨5點就起身…有咩可以令到傻仔敏同豬頭人晨甘早起身呢！！咪就係為左伊良湖早上的第一度曙光囉。今次係我同豬頭人相識以黎第一次睇日出(因為豬頭人一D都唔浪漫嫁！！)所以真係意義重大，見到太陽緩緩的從水平線上冒起，把天空染上一道紅霞，加上陣陣海風，都係令人陶醉。

7:30响酒店食完一個豐富的早餐後，我地便離開酒店，當我們離開時，酒店職員跑出來和我們揮手道別，真係窩心。之後我們便向今天的第一個景點出發，先坐車到碼頭乘坐渡輪(約hk$80/@)到鳥羽的伊勢神宮參觀，船上環境雅致，我們先到小賣部買了杯牛奶雪糕(約hk$14)，牛奶味超濃，之後便在榻榻米米上睡著了。

 

經過約 1小時的船程，我們便到達了伊勢神宮，這裡保留舊有建築，與中式的寺廟同樣有份莊嚴詳和的氣氛，雖然少了香火，但卻多少一份樸實的風味。我們入鄉隨俗，跟著日本善信，拿了個5yen去祈福許願。臨走前還見到神宮內的神馬，他真的像充滿了靈性，十分溫馴。在茶居裏，我們買了一支鋁罐裝的麥茶(約hk$18)，冰涼透心。

10:45am伊勢古典街 ~ 這裏保存了日本舊式街道的特色，街道旁商店林立，賣的都是充滿日本風味的物品，和風洋溢。

我先到玩具店抽了一個限定版的名古屋吉蒂(約hk$21)。

之後買了一串魚餅串(約hk$20)，魚旦像混合了豆腐所制，味道都唔錯。

見到和牛串燒的攤檔，香氣撲鼻，點可以錯過，一串四粒(約HK$25)，真係牛味超香，正！！

即製燒餅…睇見都想食，買左一件紫菜味(約HK$14)、一件極辣(約HK$18)，好香脆，不過極辣真係辣到眼水都標埋。

辣到標晒汗的我們，急急跑到人氣推介 - - - 豆腐雪糕(約HK$18)，太好味，另外再加多杯焦糖奶布甸(約hk$20)，我終於都明白點解邪留丸會如此愛不惜手。

得左大半個鐘後，我倆裝滿了一肚子美味的回憶甘離開伊勢古典街。

 

1:00pm坐左成個鐘頭車，去到Sun Plaza享用午餐。位置於2樓的飯廳，在每座位上放置了一份份的午餐，窩中煮著味汁豚肉，一碗亮晶晶的日本珍珠米飯…吸引了我的注意力，平時不愛吃飯的我也忍不住吃了一大碗。米飯配上醬青瓜…風味絶佳。

 

午餐過後，我們便到達傳說中的鬼城，門口站立的鬼怪與豬頭人有八成相似…好似餅印甘。所謂的鬼城，只是吸引遊客的方法，只不過有著被天然侵蝕的石頭罷。由於我倆都有點畏高，站在無圍欄的崖上都格外小心，見到其他遊人行至崖邊影相，我們還打趣笑說他們影相影到搵命搏一樣。在鬼城最大的收獲就是我終於都買到玻璃瓶的牛奶(約hk$15)，真係好味好多喎！！

 

遊覽過鬼城後，我們便要乘坐差不多兩小時的車程，在車上睡得有如暈倒一樣，不知不覺兩小時一會就過了。

 

4:30pm那智瀑布稱為「日本第一瀑布」，瀑布長約133米，闊10米，可惜9月並不是最佳的觀賞時間，水量不充，少了一點氣勢。但是話晒都係「日本第一瀑布」…點都要把握機會影相留念吧！

接著我們便向和歌山進發，進酒店前我先到途經的橋杭岩拍照，此時正值日落時份，天空一片紅霞，亦可觀賞一下大自然的力量，石頭被海水長年沖刷變得奇型怪狀。上車前先買了一盒燒墨魚丸，可惜味道一般。

 

今晚的酒店是位於三重縣的串本露天溫泉酒店，酒店大堂十分大，而且有一間有著各式各樣貨品的店鋪，行了一圈，已買了數盒和菓子。上到房間…佈置得十分精緻，今晚可以一嘗撻撻米。換過浴袍後，先拍下數照留念，今天穿著浴袍已較熟練，不用十分鐘就換好了。今晚的晚餐是品嚐日本懷石料理，料理共有15款菜，每碟都小巧精緻，但是面對面前的一碟又碟，真不知如何開始是好…理不了那些規矩了，想吃那樣就那樣啦，碟子雖少…但食來份量卻很多，肚子都吃到脹卜卜。

 

晚飯過後，又要浸溫泉的時間，今天所浸的是正宗日式溫泉，經過昨天的溫泉初體驗，今天已可自在享受。首先花了20分鐘洗淨全身，酒店提供了一系列的備長炭用品供客人使用，包括了備長炭洗頭水、護髮素、皂液、洗面膏、去角質層用品，雖然顏色黑得有如墨汁，但是卻很滋潤。

 

洗完白白後，便是嘆溫泉的時間，一浸落去…真係好舒服，泉水的熱力令全身肌肉得到了放鬆，我在池中望著滿天的繁星，想起了在男湯的豬頭人…不知他有否想起我呢？！浸了15分鐘…滿面變得通紅，我鼓起了勇氣，在冷水池裝了一盤水，閉上眼晴照頭淋，冷熱相遇的一刻，全身毛孔都好像一下子收縮了。淋完冷水後，我再次跳進溫泉去，浸了一會…發現差不多到了和豬頭人約定的時間，只好快快更衣會合。

 

點知一出黎，豬頭人已响消閒中心打緊機，我都要加入戰團，諗住夾公仔…夾番個孖寶兄弟，點知最後空手而回。唯有轉戰老虎機…最後輸左幾百yen，都係放棄罷。

 

10:00pm 回到房間，第一件事係鋪好張榻榻米先，接著便是宵夜時間，一邊打機一邊食零食…未到12點就訓著左lu…唔知點解去親旅行都特別好訓，仲早訓過係香港。

2007年9月二人成行日本大阪之旅 (1)

時差：香港時間 +1小時

 

貨幣：YEN (可在香港先行兌換)

 

電制：兩腳扁插 (120v)

 

語言：日語為主

 

氣溫：24至30度 (9月份)

 

 

2007年9月二人成行日本大阪之旅

 

2007年9月9日 (星期日) 晴

 

一早起身就坐的士的屯門碼頭搭船去機場，一去到機場…心情就變得有如晴朗的天空一樣，所有煩惱事都被我全拋到太空去。

 

9:00am辦理好登機手續之後，我們先到商鋪逛逛，之後去左大家樂食早餐，除左大家樂之外…真係無咩選擇，好似皇府甘，一碗粥加碟腸粉就成$70…真係貴得離譜。由於時間太趕，食完早餐之後我們便飛奔上機，因豬頭人的錯誤判斷，搞到連雜誌都買唔切。今次的航班選乘CX536，飛機餐仍是一貫的水準，不算太難食，沙律味道不錯。今次的機程需時約4小時，在狹少的空間坐甘耐…真係有D辛苦，好在有D新戲睇解下悶，當然唔少得打下機啦。

 

航機在名古屋機場降落，好心急…第一時間去攞行李先，機場內最靚的地方係廁所，真係乾淨到暈呀。接著我們便乘旅遊巴到愛知縣的伊良湖，今晚我們將會住在為於伊良湖view酒店。

 

到達酒店已經是晚上7時，酒店位於山上，盡望無邊大海，風景甚美。到達酒店第一時間到房間擺行李，因為我要早D食完飯然後去浸溫泉，而且依度有非常靚的海景，要把握機會同豬頭人睇下星星…浪漫一下。

 

晚餐是在酒店享用自助餐，起初不抱期望，殊不知食物十分美味，真係出乎意料的好，燒牛肉又嫩又滑、刺身鮮甜、天婦羅香脆(比和民好食十倍)、壽司係人手即製、冷面彈牙、麵豉湯香甜無味精、醬燒丸子超好味、還有超味蜜瓜…依一餐真係算是喜出望外。

 

9:00pm食飽飽後，我們先到酒店的鋪子行一下，店內的手信十分精美，但由於還有數天行程，為免提著太多負擔，所以最後都無買野。之後我地便回房間換上浴衣，我件浴衣實在太大件，有點衣不稱身，反而豬頭人就好像是度身訂造一樣，極之啱身。浸浴前先到酒店大當上網check e-mail，100yen就有10分鐘，都算好抵。

這裡的是日式風呂(不是溫泉)，即方男湯/女湯…唔可以著衫，要同其他人玉帛相見，真係有點尷尬，不過內鄉隨俗，應該尊重人家的文化，以一顆開明的心去接受。平時睇日劇OR卡通時發現劇中人在浸完溫泉後，定會在自動販賣機買凍啤酒、凍牛奶或者布甸(蠟筆小新)，睇個時我真係覺得依種係指定動作…一種非常享受的感覺，所以我都想照樣跟住做，點知無牛奶喎…最後買左雪糕，芒果味的雪糕內藏果肉，非常好味。

 

經過一天的舟車勞動，覺得非常疲累，所以食完雪糕之後就返房大覺訓。

日本之超味牛

 

黎到日本…有一樣食物係一定…一定…一定唔可以錯過 , 依樣野就係<日本之超味牛> , 當一啖放件牛落口時…你就會明白咩叫入口即溶…肉如棉花.

松板牛同神戶牛係當中不可不試的…試過了後 , 我想人人都會變成牛魔皇.

(圖中)參考價格:
松板牛 : 約hk$650/180g

神戶牛柳 : 約hk$540/180g

日本之最乾淨

 

日本真係好乾淨 , 乾淨令人出奇…而最奇的是日本街上/店舖內的垃圾筒係少到近乎零…行成條街都見唔到個垃圾筒 , 但係地方依然係乾淨無垃圾.

原來又係國民教育的問題 , 日本人習慣將垃圾先分類處理 , 而且係分得仔細無遺 , 所以他們會把垃圾帶會家分類好才棄掉…街上根本不需垃圾筒吧!!!

要數<日本之最乾淨>…經我同豬頭人議決後…一致認為係[廁所] , 日本係廁所真係乾淨到你唔信 , 先講女廁…廁所內未見過有清潔女工 , 但係裏面非常乾爽 , 無話周地水 , 又無周地廁紙 , 廁板亦乾淨到攞滿分.

男廁經愛乾淨的豬頭人評核後 , 認為係暫時所見過最乾淨的廁所 , 設計上亦係以配合使用需要而設.

<日本之最乾淨>就由廁所奪得!!!

日本之最多

 

日本係一個十分有規劃的國家 , 而且在國內的每樣設施都好像為[人]而設 , 每樣物件都在方便生活…配合生活.

在日本的旅程中 , 我發現了有一樣東西是在什麼地方都總會出現 , 形形式式的…可稱之為<日本之最多>

依樣野就係[自動販賣機] , 無論係零食 , 香煙 ,  種類多到暈的飲品 , 文具或是衣服…都會有自動販賣機. 在機場 , 酒店 , 浴場 , 街邊 , 車站 , 房間外 , 公園內…總會有數部在身邊.

<日本之最多>非[自動販賣機]莫屬.

搞笑的吸血小魔怪

我家的小孩真的很多,13歲以下的就有…卓卓~穎儀~均均~浩峄~諾諾~琳琳~童童~還有剛出世亞B…將在10月出世的小B(表哥的兒子)及玲表姐的BB.

屋企真係越黎越熱鬧 , 不過見到人家的小孩就好玩囉…如果係自己的就真是責任太大…經常同豬頭人說笑 , 現今的小孩全是吸血小魔怪 , 又要食好著好…帶佢地去一次街都足以破產 .

 

 

 

2007年9月長隆豪玩豪食之旅 (3)

2007年9月3日 (星期一)

 

今天係最後一天的旅程，訓醒已經係早午8時半，急急到餐廳食完早餐，就返房執埋d行李。今日我地會去「長隆野生動物園」參觀，我地將行李寄存在酒店得就買飛出發，由於尋晚亞公破左產，所以要夾錢先夠買飛(住客優惠門票$120)。

唔洗15分鐘，我地就到達北門入口，今天的遊人不多，成條路都我地行晒甘。今天天氣都頗悶熱，我第一時間帶番頂帽同噴蚊怕水，行左成10分鐘…都好似無咩野睇，心想係咪甘搵笨，原來係好野未出現啫！！第一步先去乘觀光火車，一到車站我地就覺得失策，我地應該包車…甘樣會舒服d。坐上火車，車身被太陽晒得滾燙，真係熱上加熱。

 

火車緩緩的駛動，我們經過大閘進入野生動物區，動物種類非常多，而且都算近距離接觸，依一刻心裏面唯一諗到的是『我要去南非！！！』。發完白日夢之後，我又重投現實，返到番禺。眼前出現無數的動物，有野鹿、羚羊、長頸鹿、河馬、老虎、獅子、黑熊、白老虎、駱駝、野豬、斑馬、水牛、岩羊…真係有點眼花撩亂。

 

經過30分鐘的乘車遊覽，我地先去食返杯雪糕降降溫，跟著繼續行程。大伙兒對動物育嬰室都好有興趣，一入到去…見到可愛精靈的馬騮bb、訓都成隻豬的老虎仔、頭擰擰的小黑熊、仲有Q到震的小笨，大家都有點樂而忘返。跟住大家走去同超精靈…好似隻貓仔的老虎仔影相(一幅唔包相的要$20)，不過隻老虎仔都幾惡。不過要數到我的至愛，非馬騮仔莫屬，小笨笨居然對住幅樹木圖書…好似想爬樹甘，真係好孤獨…希望快D放佢出黎同D同類一齊就好喇！！

中午時份，開始又熱又多蚊，都唔知係咩蚊黎…又唔怕蚊水又唔怕蚊貼，搞到我隻腳又痕又痛，經初步點算…起碼針左10撻。此刻我需要的是冷氣，所以一見到有冷氣的熊貓館即時9秒9甘衝入去，有冷氣…人都即刻精神晒，見到一隻隻又肥又大的熊貓，真係Q到暈，唔係訓覺就係大爺甘攤响度食竹，做熊貓真係幸福，又有冷氣又有野食，個個都當係寶。人類真係奇怪，識得保育絶種動物…但就唔識保護地球，地球嚴種污染…到時咪連人都絶種，但係似乎無咩人意識到依一點喎！

行行下…個天又開始陰陰地，又想落雨，今次我地醒喇，搵定地方避，走左去小食亭坐下先，點知亞詩忽然發現唔見電話，但係响邊度唔見都唔知…真係愛莫能助，今次佢真係參加左超級豪華團。好快雨就停下…大家收拾心情繼續參觀，但係我周身痕…都無咩心情，只係走馬看燈，3點半完結今天的旅程回酒店攞行李。

 

返到酒店未夠鐘去碼頭，又倦又餓，所以我地就响大堂食下零食…坐坐下，無無聊聊時，靈異界超新星『林師傅(炭頭)』攞陪notebook出黎播「怪談」，點知睇睇下酒店經理走埋黎，起初以為佢話唔可以播老翻，點知原來佢話大堂唔可以食野，我地依香港騎呢怪真係失禮死人。

 

5點準時到碼頭，上船前先到小賣部買d野食，上到船第一次間整番碗牛腩面($20)、淨水餃($20)、餐旦面($20)…味道實在麻麻，旨在填飽個肚，食飽後…睡魔急call，一訓訓到落船。

 

3天的行程好快就完結左，時間雖短，但就十分精彩，有機會定必再次到訪水上樂園。

2007年9月長隆豪玩豪食之旅 (2)

2007年9月2日 (星期日)

 

唔知點解…旅行時訓極都好似唔夠甘，一覺訓到8點，都唔想起身甘，搞搞下…成9點先去食早餐，自助早餐响「白虎餐廳」內享用，這裏非常多人，第一次响酒店食早餐要等位。等左15分鐘，終於有位坐，把握時間去攞野食，依度款式都算多，味道都唔錯，牛丸河係我的至愛。

食飽之後，我地便向眾所期待的「長隆水上樂園」出發(住客優惠門票:$130/@)。經過8分鐘的車程，就抵達全廣州最大的水上樂園。見到依到人頭湧湧，不禁有點担心。入場後第一時間租locker，擺好各人物品後，便向全亞洲唯一一個「水上大喇巴」進發。排左大約20分鐘隊，終於到我地喇！！亞旋話豬頭人夠大份，同佢一船好似安全d，所以我地成為一組，擺住個4人水泡…行到甘高，都有吃力，途中聽到d人玩到依娃鬼叫，搞到我同亞旋越黎越驚，但係上到頂…惟有頂硬上。1…2…3…工作人員一推，我地黎唔切反應，已被吸入大喇巴內，我地响大喇巴內360度不停轉…左拋右拋，叫到我地聲都沙埋，安全落到地時，我同亞旋淨係識傻笑。

接著我地再去挑戰U型滑道，我、豬頭人、亞旋再次成為一組，沖落去果下真係超驚，離心力好勁，不過豬頭人用強而有力的腳保護住我地…所以都係有驚無險。Ricky、kit ma同亞水果組超勁，fing到去勁高。炭頭同亞賢就死搏命嗌，嘈到拆天。

見到隔離滑水道無咩人，咪走過去排囉，唔洗10分鐘就有得玩，我地3人原班人馬再戰，點知今次太輕敵，水泡被拋至離地，豬頭人直情被拋起，超驚險。估唔到一條無咩特別的滑梯…會有如此驚人的威力。

 

食午餐前，大家都把握時間到夏威夷水城玩陣先，成班傻仔企定响大水桶下面，頭岳岳甘向上望，點知一倒水就個個一仆一碌，超爆笑。响水城內…炭頭發動了水戰，全部入攞水射來射去，我攞件衫笠住個頭，一方面避…一方面還擊，真係玩到無野氣。跟住個個去還勁轉滑梯，望見都驚，所以我同ricky、亞kit都無玩，變成旁觀既我地…等佢地sir落黎，見到佢地好似隻龜甘起唔到身就覺得搞笑，可惜無拍低。

 

玩到2點，係時候要搵d野食下先，園內無咩野食，隨意甘買d小食…不過都要成3百蚊，但係就食極都唔飽甘。半個鐘後居然落起大雨黎，又行雷又閃電，好似倒水甘，真係嚇死人，無辦法…唯有搵個地方避下先，點知落極都唔停，只好帶著不捨的心情收隊離場。

 

返到酒店沖個涼後，再次出動，由於落雨，所以只好留係酒店。我地去到消閑中心，一d去打桌球，一班就去打保齡球，估唔到大家都打得有板有眼，打左兩居先走人，之後就去打陣遊戲機，成7個人一齊玩部手指機都輸…真係超低能。

玩完一輪後，我地再次出動食飯，重臨「漁民新村」，為免重蹈破產的覆轍，所以我地預先計劃今晚會食得”平民化”一點。最後的菜單包括：薑蔥肉蟹($300)、枇杷燉鱷魚肉湯($200)、竹蝦刺身($400)、片皮鵝兩食($210)、炸小魚($35)、薑汁炒介蘭($25)、招牌文昌雞($78)、椒鹽大蝦($300)、鐵板牛仔骨($68)、清炒南瓜($38)、炸魚…埋單又係成千九蚊，亞公又要宣佈破產，好在回程船飛一早帶定，如果唔係分分鐘無錢返香港。

食飽飽後，去左士多買雪糕，眾人瘋狂迷上左「明治北海道牛奶紅豆雪條」，人人揸住支雪條，邊食邊返酒店。返到酒店約10點鐘，把握時間去游陣水先，起初都担心落完雨會凍，點知原來係恆溫泳池，正…！！大家在水中游下玩下，唔覺唔覺就玩左成個鐘，今日玩到腰酸背痛，所以決定去做個香薰按摩。

 

上房沖左個涼之後，我地就向spa centre進發，點知個接待員態度十分差，最後要搵經理理論，搞完一大輪…成12點先有得做($130/90分鐘)，不過算啦！！外遊都係旨在開心啫，按摩房都算整齊乾淨，技師的手藝都唔錯，推左不一會我就已經訓著左，做完按摩後已經成2點，立即返房抱頭大睡，唔明點解去旅行時特別好訓。

2007年9月長隆豪玩豪食之旅 (1)

2007年9月1日 (星期六)

「柴娃娃旅行旅」在9月份舉行了夏天之旅，是次活動名為『長隆豪玩豪食之旅』，隨隊組員包括：傻仔敏、豬頭人、kit、ricky、詩、賢、水、思敏、旋、炭頭共十人。

早上9時45分，10名組員在中港城食完早餐後，便拎住一袋二袋的行李出發，登上前往蓮花港的客輪，由於座位是採劃票形式，所以我地只需輕輕鬆鬆的搵好座位就行了。

 

船程約2小時，今次我都算叻，無暈船浪之餘仲可以成程睇雜誌，豬頭人都話我轉性。經過2小時的微浪船程，我們終於到達左番禺喇！！過關時發生了小插曲，就係ricky ba比海關扣查，聽聞佢返親內地都會有此情況，佢同peter兄真係難兄難弟，兩個都成日比人查…經過我的思考後，我終於明白點解佢地會甘有錢，原來佢都真係會有不明來歷的「財路」，可能佢地經已係公安的調查目標！！(哈…以上純屬個人低能猜測，並未經任何證實。)

 

經過ricky ba約10分鐘的擾攘，我們浩浩蕩蕩登上酒店的接駁巴士，在巴士上…亞水差d比人圍砌，好在我地人強馬強…佢先可以平安到達長隆酒店，經此事證實原來亞水都係傻既，終於都有人陪我~!

 

到達酒店，隊長ricky ba第一時間去處理取房事宜，其他無事做的人就兩頭遊，我實在係太倦，所以攤係梳化唔願行。攞左房…第一件事就係夾錢比亞公(ricky)，每pair人一千…

 

5對人都住响左右隔離…實在係太好的安排，擺好行李第一件事就梗係醫肚，求其响酒店間bar落腳，這間名為「鱷魚吧」的餐廳…果然名副其實的食人唔nur骨，又貴又唔好食，食左6個set，要成7百蚊埋單，睇黎亞公好快破產。

 

食過一餐「媽媽聲」的午餐後，我地一行10人乘坐酒店車($40)去打golf，感受下上等人的滋味，做得上等人…梗係要開番間VIP房啦！！大家起初興致勃勃甘起勢打，打下打下無甘半條命，經過一個鐘的特訓…大家都已腰酸背痛，次項活動消費$700。

 

大家打波打到成身汗，所以一致決定返酒店沖涼先。豬頭人打golf打到不知幾開心，打到由頭濕到落腳。沖完涼換件衫後，我地再次出發，今次目的地係『長隆大馬戲』(住客優惠門票：$100/@)，一入場先買d零食先，魚旦x2 ($8)、蘿白牛雜 ($15)、司華力腸x8 ($8)、煎餃x2 ($12)、可樂x無限支 ($10)。一班’化骨龍’未開場就已經食晒d野lu。

 

由於要霸位，所以我地早左半個鐘入場，坐响度都有悶，豬頭人仲想訓覺tim，我就無無聊聊甘數入場人數，數下數下…發現在場人數有成7千人，真係好誇張。

燈光轉暗…馬戲表演正式開始，揭開序幕的是空中飛人的表達，他們的動作配合得天衣無縫，加上舞台服飾，簡直係一絶。

整晚的表演節奏明快流暢，而且驚險絶倫，帶給觀眾無限驚喜，拍賞拍得雙手通紅，哇聲四起，個半小時的表演一下子就過，百多元的入場費簡直係超值。

 

看過如斯精彩的表演後，我們啟程前往晚飯，分兩輪的士前往($25/@)。今天晚餐的地方是「漁民新村」，這兒燈火通明，給人簡潔的感覺，在內地…簡潔是十分重要。大伙兒見到一個排一個的海鮮池，立即雙眼發光，破產晚宴隨即展開。鮮炒澳洲大鮑魚($750)，足足一隻手掌甘大；竹節蝦刺身($250/6隻)，買剩六隻唔夠分，豬頭人話好好味；雞湯翅($480)，又鮮又甜；豉油皇大蝦($280)，彈牙肉厚；海胆蒸旦($200)，鮮甜好味；薑汁炒介蘭($25)；炒菜芯苗($28)，超嫩；菜乾排骨粥($48)，真材實料無味精；蒸饅頭($20)；星洲炒米($28)；豉油皇炒面($28)。埋單2千蚊，飯後包車回酒店，途經士多，啤酒汽水唔少得，買完一輪之後，亞公宣佈破產，依種事情响「柴娃娃旅行團」經常發生，所以我地對於經常性「籌旗」已經十分習慣。

 

返到酒店，沖完個涼大字型攤响床度，不一會就訓著左，另外8個癲人相約睇「怪談」，我的體力已透支，無力參與，佢地居然可以睇到兩點…真係五體投地。