十大巴士核突人

我諗香港的大眾市民，日常的交通工具都離不開巴士、地鐵、小巴…，傻仔敏每日返工放工都係乘坐巴士，平時出出入入亦都係巴士，雖則地鐵係點到點、又快又有冷氣，但是我實在係無法忍受地鐵十次有九次半都無位坐和那種人貼人的情況。

 

作為我這種升斗小民，日常迫巴士的情況可謂日日發生，迫巴士無位座都唔緊要，最令人氣憤同討厭既就係撞到「十大巴士核突人」，因為你坐地鐵都話落車坐下一班y，巴士基本上都係捱全程，讓我同大家數一數十大核突。

 

以下排名不分先後，總之都係「核突」：

 

(1)    挖鼻屎 (我真係唔明，到底點解會甘，甘大個人，連基本既衛生、禮儀都唔識，係架車到係甘挖…起勢挖，我見個有個西裝友响30分鐘的車程裏，全程都未停過手，大哥！又唔係山洞…都唔知點解可以甘挖法，甘都唔流鼻血而死喎！！)

 

(2) 油淰淰 (唔知各位有無曾經試過响車上遇過一d，由頭到腳都油淰淰既人。我都係唔明，到底點解會有人可以忍受到自已成身油淰淰…到底佢地有無沖涼。個頭可以油到一餅野+頭皮、面上反光、手臂又濕又油、心口背脊濕晒一笪，成身泛著一陣油味。行出街連基本儀容都唔顧及…真攞命。)

 

(3) 大聲公 (响車上我真係好怕遇到d大聲公/大聲婆，我真係懷疑…佢地根本唔明白電話係唔受距離影響，點解要講電話大聲到好似嗌交甘？？大聲唔在講，仲要加埋個d三姑六婆式八卦事非or一連串無意義的粗口，真係嘈到頭暈，巴士係公眾場所，唔係屋企...知唔知咩叫做騷擾，顧及他人的感受可以嗎？)

 

(4) ar乍人 (ar乍人可算是巴士上的自私精，佢地比一個人既車錢，但係就霸3個人既位，個d一袋袋的餸攞晒响櫈度，搞張櫈又油又水…仲有魚腥臭味，一d公德心都無。有一次見到個女人…那天落大雨，成車都坐滿人，佢居然將把濕淋淋的遮放在櫈上，整到將櫈濕晒，之後有個小妹妹想行埋去坐，佢仲扮望唔到，真係賤到爆。仲有呀…3人位…即係3個人坐啦，但係d人永遠都漏空中間又唔願比人坐…勁衰！)

 

(5) 扭計/百厭B (BB…絶對可以成為殺人無形的武器，如果搭車碰上一個扭計B，未有小孩的朋友…生仔意欲一定化為零。因為那些BB，他們的氣力係多得驚人，一喊可以喊足全程，喊極都有氣，仲要越喊越大聲；玩亦可以玩足全程，玩唔係靜靜地玩…係玩到嘈到拆天，動手動腳；問題寶寶亦係攞命，因為佢地可以係車上問上3千個問題…上至天文下至地理，不停不停大大聲的問，就算父母唔應佢都係不停問，問到亞爸亞媽都黑晒面。)

 

(6) 臘撻人 (本身個人乾乾淨淨，但係佢地只係乾淨自己，污糟人地，即係點…咪就係咳同打乞嚏時都唔掩口，d口水鼻涕週圍飛個d人囉。政府公民片都有教啦！！一d衛生常識都無，著得幾靚咪又係個臘撻人。)

 

(7) 天殘腳 (依類人會肆無忌憚甘將一雙著住鞋的腳踩上櫈上，完全無諗過自己鞋上有成千上萬的細菌，又唔見佢地著住鞋踩上自己張床喎！！另一種天殘腳就係張雙腳撐住前面的椅背，一路un下un下，對前坐乘客造成滋擾。)

 

(8) 懶訓人 (唔知點解有d人可以完完全全甘當左巴士係屋企張床甘，訓到個頭挨晒去人度，縮極都挨落黎；有d直情訓到又流晒口水，睇見都驚心；又有人會訓到扯晒鼻鼾，嘈到成車都震晒。)

 

(9) 垃圾人 (响架車度揼垃圾已經唔啱，d人仲衰到攝响坐椅度，連清潔工人想掃都掃唔到；最衰係有d人仲要响車上吐香口膠，攪到其他人的鞋、褲都係香口膠…真係好過份。)

 

(10) 自私人 (老吾老，以及人之老；幼吾幼，以及人之幼。父親大人在我很小的時候已教導我這思想，我亦深深甘明白到和諧的社會係靠這種精神去創造。當我見到老幼弱小在車上，居然無人會主動讓座，真的慨嘆現今社會的冷漠無情。)