25/6/2006深圳一天遊

26 June

25/6/2006深圳一天遊

25/6/2006 (星期日)，今日我同豬頭人8.30a.m.就起身出發同大黃、細黃同G.鄭去深圳。我地約左係上水站度集合。

9.15a.m.我同豬頭人出發去大團火車站，先去美心買兩個包醫肚，之後就去換定d人民幣。唔知點解晨早流流都甘多人搭火車架。可能唔夠訓，所以我地兩個烏下烏下甘係粉嶺站「樁」落車，好左我精明拉番個豬頭炳入車啫。10.10a.m.到達左上水站，離遠已經見到月台上的3人眼超超，話我地兩個遲到，其實都不過係遲10分鍾之麻。

到達羅湖發現今日人流不算太多，我第一次攞智能身份證黎過關，有d「傻仔」唔係好識點用~ ~我都要申請用e道先得。跟住我地一行五人就去坐地鐵，深圳的地鐵環境尚算清潔，不過d冷氣就真係差好多，成個地鐵都好似無冷氣甘，出入係利用一個綠色的塑膠幣，有d似籌碼甘都幾得意，同埋深圳有張叫「深圳通」既通行咭，就等同於香港既八達通。我地坐到一個叫「老街」的地方落車，由於大家都有d肚餓，所以就去左「面點王」度食野，依度係大黃大力推薦既，雖然不至於話好好食，不過環境、價錢、味道都ok啦。食左一個鐘頭度，我地就向「東門大街」出發，依度各式產品琳瑯滿目，不過大部份都係冒牌貨…像真度仲好高添。街上的遊人好多，街頭的店子滿是人，反而商場內的遊人就得小貓三、兩隻。由於貨品不適合，所以我地就提早出發去「按摩 ~ ~」。

1.30p.m. 我地乘坐由按摩場免費提供接送既7人車，架車又新又靚，都好得嫁，經過15分鐘車程，就到左「新東方」，依度既環境比我預期好好多，地方又大又新，而且服務員又多，又唔迫…依個價錢黎講真係好抵。埋單每位連小費都只不過係$120-，$120就已經按足3個鐘(包括1個鐘腳部、2個鐘全身)。見豬頭人舒服得呼呼入睡，就知道有幾舒服啦！

4.30p.m.我地離開左按摩中心，跟住佢地就去左剪髮同洗頭，我同豬頭人就去食下什茶，途中見到一隻馬騮仔表現，大陸連馬騮都好似瘦過人，比香港野生個d仲要瘦。

5.40p.m.我地就搵地方食飯lu，行左兩條街，終於決定左去食中菜，去左一間叫「食為先」的酒家，個度環境都唔錯，食左：片皮鴨(好好味)、鮑汁雞腳(好諗好入味)、脆豆腐(超滑)、紅酒牛尾煲(甜甜地好入味)、蒜蓉蒸扇貝(嘩…又大隻又甜…)、薑蔥魚卜(第一次食…正！)、豉油鴨咀(個樣唔得…我唔啱食)、原個木瓜雪蛤糕/燕窩(都算足料)，食後仲有生果同甜品，埋單$370-個個食到飽飽。

食完飯傾下傾下就8點，我地就慢步去坐車。過關都算快，我地9.15p.m.就到屋企lu。

今天玩得好開心，下次有機會就同豬頭人自己去。