重臨盛八

重臨盛八

每逢星期五的晚上，街上總變得人山人海，食店外堆滿了輪候的食客，每逢見到這些情況…額上都會滴下冷汗，要我輪候1小時或以上食一頓飯，就算那是我非常喜愛的餐廳也好，我都不會白白浪費珍貴的時間。

由於豬頭人工作的關係，最算星期五都未必可以Happy Friday，好多時都要8至9點才離開公司，不過「星期五約會」這習慣由我們初相識時已開始，所以無論等多久，我還是會等他放工，接著看電影或吃晚餐(宵夜)，回想起早年那些日子…等得還苦，在街上逛3-4小時…都不知如何打發時間，現在起碼可在公司坐著等他，可以看雜誌或打機，時間較易過。

「星期五約會」的地點多數是在旺角，因為近公司之餘，又有戲院和各式各樣的食肆。戲院首選當然離不開朗豪坊，不過通常要預先訂票，間唔中都會去百老匯電影中心睇d較冷門的電影。至於食的地方…真係多到數唔晒，但大部份都係人頭湧湧，我依個傻仔，有次為討豬頭人高興…在『和花亭』足足排了2小時，自此之後，我發現做個豬見豬愛的女朋友一點都不易，試過一次就夠。

認識我的朋友都會知，「食」、「訓覺」、「旅行」係我生命的動力，我真係好鍾意食野，就算食到好飽…只要一見到想食/好食的食物，我一樣可以食。如果你問我，買咩最抵、最值、最捨得…個一樣一定係食。

 

今晚我地再次黎到盛八，其實一早知依度貴又食唔飽，但係真係想食…唔計得甘多。我同豬頭人先商量食d咩，之後便望著火爐吹下水等食野。首先登場的是厚切和牛肩(100蚊得5塊)、一口和牛(一定無10粒)、盛八腸(得幾粒，椰菜墊晒底)、溫泉玉子沙律(菜係最多)、石頭窩飯(份量只夠供應豬頭人)…雖然真係好似食左一陣風，但係又真係好食喎！！！加上女待應的超水準服務，依一餐都係又開心又好食既，本來諗住影相寫食評…不過一如以住，傻仔敏都係食剩3分1時才會記起要影相。