地球停轉日 (The Day The Earth Stood Still)

 

地球停轉日 (The Day The Earth Stood Still)

 

今個星期一直下著雨，迫使我們打消去游水的念頭，平日已不太喜歡在街上閒逛，何況是這種天雨路滑的日子。如何打發時間，最好便是看看電視和影碟，今次找來一套『地球停轉日 (The Day The Earth Stood Still)』。

 

這套電影的音响效果不錯，開初是滿有期望的，縱使之前聽到的盡是劣評。開場的漫天飛雪，令我以為故事會由極地開展，但…轉眼…看來又不是，是否一條伏線？？看著…有好像不是。

 

Keanu Reeves從天而下，從那光球體中出現，還有的是那巨大的金屬機械人。Keanu Reeves依舊是那些表情，(1)木口木面；(2)眉頭深鎖；(3)一面疑惑。看了一半，難怪片中的政府人員不明外星人的動機，因為真係估佢到，我都不停問著豬頭人「到底佢地想點？？」九萬幾個問號在頭上轉，我知…人類係無知、狂妄、自大、輕率、膚淺，但係外星人說的「已比左機會」，我可以好肯定這個是莫須有的罪名，因為有頭到尾Keanu Reeves都無講過自己黎做咩！

 

一出場佢淨係話「地球唔係屬於你地」，大哥…一聽就只覺得你係黎搶野同打劫，想搶左地球去，甘人類還拖都好正常啫！！

 

搞完一場大龍鳳，心意堅定的外星人，堅決認為人類無可救藥的外星人，無程程…無厘頭停手，不知係因為女博士一頭講到尾個句「change」，還是同個仔那份非常流於表面的感情所感動，在最後個9秒9突然停手。

 

「救命…呀！！！」傻仔敏睇完之後就狂呼這句，這部電影唔合理、無劇情，最慘係Keanu Reeves同Jennifer Connelly都無戲交，最終換來觀眾睇到眼火爆。叫什麼地球停轉日，應該是外星人停手日、問號唔停日、怒火爆發日…