傻仔敏~ ~ ~ My Reminiscence: 自己嚇自己之迪士尼黑色世界

18/10/2008 (星期六)

今天我們大伙兒(傻仔敏、豬頭人、亞水、小黑、man、康、賢、ricky、kit、炭頭、旋、仲有炭頭哥哥及嫂嫂)直闖迪士尼黑色世界，事前聽亞水話門票有限，每晚只會有一千張門票發售，但當我們乘迪士尼線的列車時發現單單一卡車上已成千人，亞水真係無改錯名，名符其實正水怪。

當到達大門口噴水池，在場人數真係一千加多個零都唔止，攞左門票後，連同亞康、man先入場食野…個人認為園內的食物還算不錯，70多元便有漢堡包、雞味香飯、烤雞翼同一支水，價錢還算相宜，當中雞味香飯尤其討好，我差不多吃了一大半。

吃飽後便慢步前往觀看巡遊(夜光鬼魅巡遊)，吃得太飽胃頂頂，正當想串ricky佢地又遲到時，收到亞水的驚人新消息(~ ~ ~這個消息足以令大家目瞪口呆…比鬼屋驚嚇十倍，不過這篇還是講回黑色世界迪士尼吧！！)驚魂未定的我…只得拖著豬頭人跟著大圍人走著，左轉右轉下來到鬼屋的入口，但那條人龍長得如連綿千里，根本看不到盡頭在那，對於我們這群「等不得」的人來說，實是件苦事，所以經一致商討後，決定先行轉戰其他遊戲。

第一步先取下Space Mountain的Fast pass，為配合黑色世界的主題，所以今次是 Ghost Galaxy版。就算攞左Fast pass都要等成2個鐘，一行十幾人依段時間做咩好呢？

最終揀左個無咩人玩的「Buzz Lightyear Astro Blasters」，成班暴龍坐响架車度左轉右轉發晒癲甘揸住支熗起勢射，真係諗起都低能。轉完一輪出到黎都有d頭暈，坐低休息一陣後，再次去轉…轉…轉…今次玩「小飛象旋轉世界」，本來諗住靠亞賢影低我們的「象上英姿」，點知要搵佢時就唔見人，真係比佢激死。

隻小飛象唔知係咪趕收工，轉起上黎都幾快，我地响半空起勢甘揮手叫嗌亞水，諗住比d友情之火支持下佢，點知佢勁「行」甘求其揮下隻手就算，真係把我們的心意掉入江水去…~ ~ ~

又轉完一輪，又跳又叫完的我們已經身水身汗，汗人ricky更是汗如泉湧，依個時候最好就係嘆下冷氣，依個時候去「米奇幻想曲」就最好不過，在觀看期間…配合的播放出現的又風又雨效果，實令人熱氣全消。不過真係要投訴下副3D眼鏡，鏡面已被壓得變曲了，嚴重影響了視覺效果。

嘆完冷氣…時間都快到了，我們便前往「Space Mountain」，非常唔彩…坐左响小黑同亞賢前面，車都未開已比佢地兩個的尖叫聲搞到頭暈，話就話今次係Ghost Galaxy版，不過真係無法感受到任何分別，但係總算係園內最刺激的遊戲了。玩完落車有點腳軟軟，ricky同炭頭encore多次，我地就選擇買杯爆谷坐一陣。

此時園內廣播11點就閂門…我地梗係玩唔夠多，黎到黑色世界…以經成條街只見人影，鬼影就搵多隻都無，如果連鬼屋都無玩，點對得住自己，心有不甘的我們便決定強闖鬼屋「大街詭異酒店」，加快腳步跑到去，剛好入得切，終於可以去嚇鬼。

一入到鬼酒店，同行娃鬼而入晒戲，搞笑在胆少kit媽居然學人行頭；亞賢同炭頭就四處搞事；亞旋諗住捉住小黑作保護，點知小黑自身難保嚇破胆；亞水就比女攬到實，都唔知顧女定顧鬼；炭頭以為其中一條屍係假野…點知原來係真鬼(人)，比隻鬼追住佢問「邊..個..打..我..個..頭.. ~ ~ ~」；豬頭人就攞我出黎擋…完全無義氣可言。