買衫食飯行街街

20/4/2007 (星期五)

今天約左豬頭人到尖沙咀食飯、睇戲，因為我較早放工，所以我先行到尖沙咀行街街。我响中心對面坐小巴到尖沙咀，落車位置有間ESPRIT OUTLET，諗住會有平野執，點知依度好係一個雜架攤甘，而且貨物又唔係平…同平時個D一樣，所以我最係都係買左2件背心(一紅一白)。接著就繼續向我的購物之旅出發，點知行下行下…都唔知點解會行左去條崛頭行，蕩失路…係尖沙咀都可以蕩失路，唔怪得豬頭人成日都話我「烏烏下」。

千辛萬苦…終於都行番去一個我認得的地方，之後去到美麗華商場，未到7點…Todai就已經坐滿人，真係好生意到不得了，不過依度都算抵食既…不過就係太多人同食物款式無咩變化囉。接著我就去到Uniqlo行下，豬頭人話自己好快到…希望佢唔好講大話啦！！上次响Uniqlo買左幾件棉式衫，著得都幾舒服，所以今次買多兩件，另外仲買左件鮮黃色的背心…有花花邊的，依件係我最鍾意既一件。

行左半個鐘度，豬頭人終於黎到，時間係晚上7時45分，今次佢都算有口齒。本來諗住可以去食飯啦，點知佢話星期日要踏單車，所以要買條短褲…真係比佢激死，要特登買條褲，仲要成$200-買完褲又話要買衫，搞下搞下…成9點先去到食飯。

晚餐黎到位於美麗華內的森巴餐廳，我們點了兩個set，餐湯：法式龍虾湯、黑松露菌忌廉湯(非常美味！)；頭盤(六款)：黑醋伴煎鵝肝併哈密瓜(超香脆)、煙肉薯蓉伴忌廉汁(個汁好好味，薯蓉好滑)、炸軟殼蟹甜菜沙律(d菜勁爽甜)、焗忌廉雜菌酥皮盒(個酥皮好好味，雜菌好香)、芝士焗蠔(好香濃)、鮮芒大蝦沙律(係蘋果芒黎…好甜好味)；主菜：燒豬肋骨配芝士薯蓉(豬頭人至愛，佢話個燒汁一流)、牛仔牛配甜蕃薯飯(個牛仔肉好食…飯就麻麻)；甜品：藍莓芝士餅(個餅底好食到震，又滑…同豬頭人爭食)、開心果焦糖雪糕(用料十足、口感豐富…好明顯係自家製，出面食唔到)；餐飲：凍咖啡(好香濃…)。依一餐食左2個鐘，睇戲的計劃只好擱置。